2024 жылы Қазақстан мұнайы алғаш рет өндірілгеніне 125 жыл толды

2024 жылы Қазақстан мұнайы алғаш рет өндірілгеніне 125 жыл толды. Бұл атаулы дата – еліміздің экономикалық, индустриялық және әлеуметтік дамуындағы маңызды кезеңдердің бірі. 1899 жылдың 18 қарашасында Атырау облысы, Жылыой ауданы, Қарашұңғыл кен орнынан №7 ұңғыда 40 метр тереңдіктен алғаш мұнай бұрқағы атқылады, бұл еліміздегі мұнай-газ саласының бастау алған уақыты ретінде тарихта қалды. Осы айтулы мерекеге орай «Мұнайтелеком» ЖШС «Жас мамандар кеңесінің» ұйымдастыруымен зияткерлік «Ой дода» сайысы ұйымдастырылды. Ойынға мекеменің орталық аппаратынан бөлек, Жаңаөзен, Жетібай, Қаламқас кен орнында еңбек ететін жұмысшылардан құралған 8 топ қатысты. Жарыс барысында қатысушылардың білімдері мен шығармашылық қабілеттері жоғары бағаланды.Тартысты 5 турдан құралған ойында «Әжемнің шәйі» командасы топ жарды. Сайыс қорытындысы бойынша жеңімпаздарға арнайы сыйлықтар мен алғыс хаттар табысталды. Ұйымдастырушылар барлық қатысушыларға алғыс білдіріп, мұндай шаралардың алдағы уақытта да жалғасатынын атап өтті. Қазақстан мұнайының 125 жылдық мерейтойы – бұл еліміздің даму тарихындағы маңызды белес. Осындай шаралар арқылы жастардың осы тарихи мұраны бағалап, оны одан әрі дамытуға деген қызығушылығы арта түсетіні сөзсіз. Қара алтын қоры сарқылмай, еліміздің ертеңі үшін игеріле берсін деген тілектеміз!

25 желтоқсан 2024

Жеті Қадам